चीनविषयी आत्ताच एक स्वप्न पाहिलं, स्वप्नात आलं मोदींचं भाषण!

भाइयों-बहनौं, आम्ही चीनला पिचकारी मारून-मारून रंगवून टाकू. चीननं दहशतवादाची पाठराखण केली आहे. त्याची शिक्षा भोगायला लागेल. आम्ही पाकिस्तानला घुसून मारलं. आता चीनला पिचकारीनं मारू. होळीच्या आधी जेवढ्या काही चिनी पिचकाऱ्या आल्या आहेत, मी प्रत्येक देशभक्ताला आवाहन करतो की, त्यांनी फक्त तीन गोष्टी घेऊन सीमेवर पोहचावं – एक बादलीभर पाणी, रंग आणि चीनची पिचकारी. यावेळी आपण सगळे चिनी पिचकारीनेच चीनच्या सैन्याला इतकं भिजवून टाकू की, शिंकून शिंकून चीनची बोलती बंद होऊन जाईल.

भाइयों-बहनौं, मी सर्व टीव्ही अँकर्सना ट्विट केलं आहे की, त्यांनी टीव्ही स्टुडिओत पिचकारी घेऊन अँकरिंग करावं. आता प्रत्येक भारतीयांसाठी काँग्रेस चीनची समर्थक झाली आहे. काँग्रेसच्या नेत्यांनी पाकिस्तानचं समर्थन केलं आहे. चीननं पाकिस्तानचं समर्थन केलं आहे. अँकर्सना आवाहन आहे की, त्यांनी काँग्रेसचे प्रवक्ते आलोक आणि राजीव त्यागी यांना रंगांत पूर्ण रंगवून टाकावं. आम्ही बदला घेऊ. हर हर मोदी, घर घर होली!

पंतप्रधानांचं हे भाषण ऐकून मी व्हॉटसअॅप विद्यापीठाकडे वळलो. इनबॉक्समध्ये पडलेली पुस्तकं उलटू लागलो. एका डाव्या प्राध्यापकानं तो भाग गायब केला होता, ज्यात चिनी पिचकारीच्या विरोधाचा इतिहास लिहिलेला होता. सकाळपासून एकही मॅसेज आला नाही की, आज चिनी पिचकाऱ्यांवर बहिष्कार टाकला जाईल. जो भारतीय चिनी पिचकारी विकेल, तो मसूद अज़हरचा जावई असेल. स्वत:चं व्हॉटसअॅप स्टेटस तयार केल्यानंतर ते मी ‘अबकी बार, पिचकारी सरकार’ या ग्रूपवर पाठवून दिलं. तिथून ते व्हायरलं झालं.

चीन नेहमीच दहशतवादाचा मित्र राहिला आहे. आपल्याला चीनची साथ द्यायची नाही. जे लोक चिनी सामान आणून भारताचा पैसा बिजिंगला पाठवतात, आम्ही त्यांना दार्जिलिंगला पाठवू. तिथं त्यांना भारतीय ‘मोमो’ बनवण्याचं प्रशिक्षण दिलं जाईल. आम्ही चीनला घुमघुम घुमवलं, पण चीननं आम्हाला घुमवलं. आमचं काम झालं आहे. सरदार पटेल यांचा पुतळा आम्ही बनवला आहे. चीनचे इंजिनीअर परत गेले आहेत. भारतीय कामगार बिनपगारी पटेलांचं संरक्षण करू शकतात.

पण आम्ही चीनची ही धमकी ऐकून घेऊ शकत नाही. तेव्हाच टीव्हीवर पंतप्रधानांचं अजून एक भाषण आलं. ते जनतेला विचारत होते - चीन को घर में घुस कर मारना चाहिए कि नहीं? एका अँकरनं आव्हान दिलं. चीनशी युद्धाचे सर्व्हे होऊ लागले. पंतप्रधानांचे समर्थक सीमेवर पिचकारी भरून घेऊन जाताना दिसत होते.

किती काळ आम्ही चीनविषयी चूपचाप बसून राहायचं? नेहरू चूप बसले होते, पण नरेंद्र मोदी चूप बसणार नाहीत. जे नेहरू करू शकले नाहीत, तेच तर मोदी करतात! ते झोपळा झुलवू शकतात, तसाचं झटकाही देऊ शकतात.

तेवढ्यात व्हाटसअॅप विद्यापीठात एक मॅसेज येतो. चीनचा विरोध पिचकारी आणि फुलझडीपर्यंतच मर्यादित ठेवायचा आहे. टीव्ही अँकर्सना चीनसोबत शांततेची बोलणी करायची आहेत. चीननं मसूद अज़हरची साथ देऊन पुलवामाच्या शहिदांचा अपमान केला आहे, हे बोलायचं नाही. ‘चीनबाबत चुप्पी’सारख्या ब्रेकिंग न्यूज टीव्हीवर चालवायच्या नाहीत. ‘चीन डर गया भारत से’ किंवा ‘भारत डर गया चीन से’ यासारखे नारे टीव्ही वाहिन्यांवर दिसता कामा नयेत. एकजण न्यूजरूममध्ये जाऊन सर्वांना झापत होता. संपादक ‘मूर्गा’ होऊन बसलेले होते. संपादकांचे मालक अमित शहांकडून ब्रीफकेसमधून सूचना घेत होते. ‘जाहिराती’चं नवं नाव ‘सूचना’ असं आहे.

तेवढ्यात कुणीतरी जोरात ओरडतं. पंतप्रधान मोदींचं लाईव्ह टीव्ही वाहिन्यांवर येऊ लागतं. ते म्हणतात - भाइयों और बहनों, काँग्रेसनं शहिदांचा अपमान केला आहे. तिला हरवायचं आहे. म्हणजे चीनचा आपोआप पराभव होईल. आमचं परराष्ट्रीय धोरण इटावापासून बेगुसरायपर्यंत हिट आहे. आम्ही जिंकत आहोत. आम्ही पाकिस्तानला घुसून मारलं आहे. तुम्ही त्यातच हेही समजून घ्या की, आम्ही त्याचा दोस्त पाकिस्तानलाही मारलं आहे. आम्ही एक अधिक एक नाही करत, आम्ही एकाचे चार करतो, एकाचे चार!

मी स्वप्नातून बाहेर येत होतो. झोपेतून हळूहळू जागा होऊ लागलो. खिडकीत बसून पावसाचे थेंब मोजू लागलो. मतदान केंद्रांवर मतदान होत होतं. लोक आपल्या असत्यापासून हरत होते. गावागावात लोक म्हणत होते की, परराष्ट्रनीतीमध्ये मोदी जिंकले आहेत. चिनी पिचकारीनं चीनला हरवलं आहे.

टीव्ही अँकरनं जाहीर केलं, ७० वर्षांत असं कधीही झालं नाही. आज पहिल्यांदा असत्य जिंकलं होतं. मी जागा झालो होतो. व्हॉटसअॅप विद्यापीठाच्या इनबॉक्समध्ये मॅसेजेस पाहत होतो. आतापर्यंत तरी चिनी पिचकारीवरील बहिष्काराचं कुठलंही आवाहन आलेलं नाही. तुमच्याकडे असे मॅसेजेस येत आहेत का?

(स्वैर अनुवाद - टीम अक्षरनामा. रवीश कुमार यांची मूळ हिंदी पोस्ट १४ मार्च १९ रोजी दुपारी १.१९ ला प्रसिद्ध झाली आहे.)

...............................................................................................................................................................

Copyright www.aksharnama.com 2017. सदर लेख अथवा लेखातील कुठल्याही भागाचे छापील, इलेक्ट्रॉनिक माध्यमात परवानगीशिवाय पुनर्मुद्रण करण्यास सक्त मनाई आहे. याचे उल्लंघन करणाऱ्यांवर कायदेशीर कारवाई करण्यात येईल.

............................................................................................................................................................

‘अक्षरनामा’ला आर्थिक मदत करण्यासाठी क्लिक करा -

............................................................................................................................................................