टपल्या

१. आपण सर्व मोबाईल बँकिंग आणि मोबाईल वॉलेट्सच्या युगात आहोत. जेवण मागवणं, फर्निचर विकत घेणं, टॅक्सी मागवणे या सर्वच गोष्टी मोबाईलच्या माध्यमातून केल्या जाऊ शकतात. तंत्रज्ञानामुळे सर्व काही सुखकर आणि वेगवान झालं आहे. : 'लिंक्ड इन'साठी लिहिलेल्या लेखात पंतप्रधान नरेंद्र मोदी.

जिथं पिण्याचं पाणीही आयाबायांना अनेक मैलांवरून डोक्यावरून वाहून आणावं लागतं आणि लाइटही दिवसातून १२-१५ तास गायब असते, अशा आमच्या दुर्गम खेड्यांतल्या आणि आदिवासी पाड्यांतल्या बांधवांना इंग्रजी वाचता येत नाही, हे केवढं मोठं भाग्य! नाहीतर त्यांनी पंतप्रधान मोदी ज्या देशात राहतात, त्याच देशात ‘घेऊन चला’ राहायला, असा हट्ट धरला असता आणि पंचाईत झाली असती!

…………………………..

२. सरकारी कर्मचाऱ्यांचं नोव्हेंबर महिन्याचं वेतन आणि सेवानिवृत्त कर्मचाऱ्यांचं निवृत्तीवेतन रोखीनं देण्याची मागणी राज्य सरकारने मान्य केली नाहीच; उलट बँकांमध्ये गर्दी करू नका, गरज असेल तेव्हा आणि आवश्यकता असेल तेवढेच पगारातील पैसे काढा, असा सल्लाही राज्य सरकारने या कर्मचाऱ्यांना दिला आहे.

सरकारचाही दोष नाही. मुळात एखाद्या कर्मचाऱ्याला तसाच काही अडीअडचणीचा प्रसंग असल्याखेरीज पगाराचे पैसे काढायलाच का लागावेत, असा मूलभूत प्रश्न त्यांना पडलेला असू शकतो ना!

…………………………..

३. पंतप्रधान कार्यालयाने (पीएमओ) रिलायन्स जिओच्या जाहिरातींमध्ये पंतप्रधान नरेंद्र मोदी यांचे फोटो वापरण्याची परवानगी दिली नव्हती. मात्र, फोटो वापरला जाणार आहे, याची सरकारला कल्पना होती.

अंबानी काय, अडाणी काय, सरकार काय, सगळे एकच! भारत सगळा एक आहे, सगळेच आपले बांधव आहेत. वाटीतलं ताटात आणि ताटातलं वाटीत होतंच की! त्याचा कोणी हिशोब करतं का?

…………………………..

४. मोदी हे आमचेही पंतप्रधान आहेत. त्यांनी डिजिटल इंडियाचं स्वप्न पाहिलं आहे आणि मीही त्यामुळे प्रेरित झालो आहे. आम्ही या भारतीय नेत्याचं स्वप्न, भारत आणि भारतीयांना आमची सेवा समर्पित करत आहोत आणि त्यामुळेच जिओच्या जाहिरातीत मोदींचा फोटो वापरण्यात काहीही राजकीय नाही : मुकेश अंबानी.

मोदी हे 'आमचेही' पंतप्रधान आहेत, हे वाक्य मनोज्ञ आहे… त्यापुढचं 'एकट्या अडाणींचे नाहीयेत काही' हे अनुच्चारित वाक्यही कसं स्पष्टपणे ऐकू येतं की नाही? बाकी अंबानी देशाची सेवा करतात, म्हटल्यावर देशात २७ मजली (अंबानींच्या अँटिलियाच्या उंचीइतकं) हास्यस्फोट झाला म्हणे!

…………………………..

५. पाकिस्तान हा विस्मयकारक देश आहे. इथली जनता सुज्ञ आणि हुशार आहे. पंतप्रधान नवाझ शरीफ यांचा चांगला नावलौकिक आहे, त्यांनी उल्लेखनीय कामगिरी केली आहे. पाकिस्तानच्या समस्या सोडवण्यासाठी सर्वतोपरी प्रयत्न करणार : डोनाल्ड ट्रम्प.

तात्यांच्या विजयानिमित्त सत्यनारायण घालणारे आणि यज्ञयाग करणारे आता समोर आले की, फुटपाथ बदलतात… मुंगसानं कितीही आकर्षक डिस्को डान्स करून दाखवला, तरी गारुडी सापालाच दूध पाजतो.

editor@aksharnama.com