अजूनकाही
गेल्या तीन-चार दिवसांत फेसबुकवर एका हरणाच्या मातृप्रेमाची पोस्ट फिरत आहे. एक हरिणमाता आपल्या पिल्लांसोबत जंगलामध्ये फिरत असताना चित्त्यांच्या तावडीत सापडतात. चित्ते त्यांचा पाठलाग करू लागतात, तेव्हा हरिणमातेला कळून चुकतं की, आपली पिल्लं या चित्त्यांच्या तावडीत सापडणार. तेव्हा ती थांबून पिल्लांना पळून जायला सांगते आणि स्वत: चित्त्यांच्या स्वाधीन होते. ती थांबल्यामुळे चित्तेही थांबून तिच्यावर तुटून पडतात. पण ती आपली पिल्लं दिशेनाशी होऊपर्यंत त्यांच्यावरून नजर हटवत नाही, तोवर चित्त्यांना स्वत:च्या शरीराचे लचके तोडू देते…
अशा आशयाची ही पोस्ट कुणीतरी फेसबुकवर छायाचित्रासह टाकली. मग काय त्यावर लाईक्स, कमेंट, शेअर यांचा धडाका सुरू झाला. मातृप्रेमाचं उदात्तीकरण सांगणाऱ्या कमेंट केल्या जाऊ लागल्या. अनेक जण मातृप्रेमाचा सर्वोच्च आविष्कार म्हणून तो फोटो शेअर करू लागले. चित्त्यांच्या तावडीत सापडलेल्या हरणाचा फोटो आहेच इतका, जबरदस्त की कुणाला त्याची शंका आली नाही.
त्यात या छायाचित्राला सर्वोत्तम छायाचित्राचा पुरस्कार मिळाला आणि हे छायाचित्र काढणारी छायाचित्रकार काही काळ नैराश्यच्या गर्तेत गेली होती, यावरही अनेकांचा विश्वास बसला. त्यामुळे फेसबुकवर आईची महती सांगणारी वचनं, सुभाषितं, किस्से, स्वानुभव यांचा पाऊस पडला. आईविषयाच्या कवितांपासून संस्कृत सुभाषितांपर्यंत मातृप्रेमाचं महन्मंगल स्तोत्र गायलं गेलं.
ही पोस्ट गेले तीन-चार दिवस फेसबुकवर प्रचंड लोकप्रिय झाली. पण ही फेकस्टोरी आहे. कुणीतरी अर्धवट माहितीच्या आधारे ती फेसबुकवर टाकली हे आता उघड झालं आहे. ते छायाचित्र काढणाऱ्या छायाचित्रकार alison buttigieg यांच्याशी काही इंग्रजी वर्तमानपत्रांनी संपर्क साधला. तेव्हा त्यामागची ट्रु स्टोरी समोर आली.
अॅलिसन ही वाइल्ड लाइफ फोटोग्राफर आहे. http://www.alisonbuttigieg.com या तिच्या बेवसाईटवर तिने काढलेली कितीतरी छायाचित्रं आहेत. त्यात वरील चित्ता-हरिणाविषयीची छायाचित्रं आहेत. त्याविषयी अॅलिसनने आपल्या बेवसाईटवर लिहिलं आहे –
यापुढे अॅलिसनने या ट्रु स्टोरीची तब्बल नऊ छायाचित्रं दिली आहेत.
ही हरिणमातेच्या असीम त्यागाची गोष्ट नसून चित्त्याची मादी तिच्या दोन बछड्यांना शिकार करायला शिकवते, त्याची गोष्ट आहे.
तिघांच्या तावडीत सापडल्याने हरिण हतबल झालं होतं.
सुरुवातीला चित्त्याच्या मादीने हरणाचा जबडा पकडून आपल्या बछड्यांना मार्गदर्शन केलं. नंतर त्यांनी हरणावर चाल केली.
पण बछडेच ते. त्यांना या साऱ्या प्रकाराची गंमत वाटत होती. त्यामुळे ते हरणाला खेळवतही होते.
हरणाला आपलं मरण समोर दिसत होतं, पण काहीच करता येत नव्हतं.
हेच ते फेसबुकवर व्हायरल झालेलं मूळ छायाचित्र. हरण आपल्या पिल्लांकडे टक लावून वगैरे पाहत नसून समोर मृत्यू पाहत आहे.
शेवटी बछड्यांनी हरणाला जमिनीवर पाडायला सुरुवात केली.
बछड्यांची आई सोबत होतीच.
हरणाला भुईसपाट करण्यात अखेर बछड्यांना यश आलं. त्यांच्या आईने अखेर हरणाची वेदनेपासून सुटका केली आणि आपल्या बछड्यांना ताजी शिकार मिळवायलाही शिकवलं. ‘जीवो जिवस्य जिवनम’ हे जंगलाचं सूत्र आहे. त्यानुसार चित्त्यांनी या हरणाची शिकार केली.
या फेकस्टोरीविषयी नाराजी व्यक्त करत ही छायाचित्रं काढल्यानंतर आपल्याला नैराश्य वगैरे काहीही आलं नव्हतं, हे स्पष्ट करणारी पोस्ट अॅलिसन यांनी आपल्या फेसबुक पेजवर लिहिली.
editor@aksharnama.com
© 2024 अक्षरनामा. All rights reserved Developed by Exobytes Solutions LLP.
Post Comment